Letër dërguar Albin Kurtit

Kjo shkresë iu dërgua Albin Kurtit nga një student i minoritetit Egjiptian
në Kosovë dhe u lexua para disa kohe në emisionin e drejtpërdrejt -
" Me Albinin " në RTK.

I Nderuari Albin,

Ju përshëndeti dhe Ju përgëzoi për emisionin të cilin e udhëheqni. Vërtetë emisioni
"Me Albinin" është emisioni më i pëlqyer për mua dhe e pres ma pa durim, por po ndodhë që nganjëherë të mbetëm i zhgënjyer për shkak se nuk po mund t ´ju ndjekë në mungesë të rrymës. Unë e di se nuk ju pëlqen që t ´ju lavdërojnë por them me modesti se Ju me zgjuarsi i shtjelloni temat të cilat janë gjithësesi të qëlluara dhe mendoi unë shumëqka mund te mesojmë nga ju.
Mua me beri pershtypje pyetja e anketes suaj per këtë javë:
"Si po sjellen shqipëtaret ndaj pakicave në Kosovë ?"(nëse nuk e kam gabuar pyetjen).
Unë do të përpiqem që të jap opinjonin tim në lidhje me gjendjen e një komuniteti i cili e quan veten Egjiptian pasi që unë i takoi këtij komuniteti.
Nëse keni durim po ju tregoi se kush janë Egjiptianët e Kosovës.

Numri i Egjiptianëve në Kosovë është diku 20-30 mijë (nuk jam i sigurtë), gjuhë amëtare kanë gjuhën shqipe (nuk e njohin gjuhën rome), kanë doke dhe zakone shqiptare, janë me fe islame. Shumica e këtij komuniteti me vite janë deklaruar si shqiptarë (disa edhe sot deklarohen). Ndërsa dallohen nga shqiptarët për nga ngjyra edhe pse disa edhe nuk mund të dallohen dhe martesat reciproke nuk ndodhin (shumë rrallë). Shumica e këtij komuniteti janë solidarizuar me shqiptarët gjatë rezistencës paqësore dhe gjatë rezistencës së armatosur. Me solidarizim nënkuptoi pjesmarrja në greva të punëtorve, largimi nga puna për shkak të pjesëmarrjes në greva, keqtrajtimi për shkak të anëtarsimit në LDK, kontributi financiar ( në qeverin e Bukoshit, Vendlindja Thërret), pjesëmarrja në protesta (unë isha pjesëmarrës në protestat e studentëve të udhëhequra nga UPSUP), pjesëmarrja në UÇK, largimi (dëbimi) nga Kosova gjatë luftës etj.
Unë në këtë rastë nuk u mundova që këtë komunitet ta proklamoi si patriot por është e vërtetë që ky komunitet u solidarizua me shqiptarët (edhe pse pati individ ose grupe që u solidarizuan edhe me serbët sikur pati edhe shqiptarë).

Unë jam zhgenjyer shumë pas luftës me faktin se qfarë i ndodhi këtij komuniteti. Unë nuk di shifra të sakta se sa njerëz të këtij komuniteti u vranë ose u dëbuan nga Kosova pas luftës po unë e di se (vetëm në një komunë) janë vrarë të paktën katër fëmijë (prej 9 deri 14 vjeq) dhe pesë pleqë prej të cilëve një femër e cila ishte e paralizuar dhe disa lagje të banuara nga ky komunitet u zbrazen.
Zhgenjimin më të madh e përjetova kur askush prej intelektualëve (përpos Demaqit) nuk e ngriti zërin (por as me zë të ulët) për këtë që po i ndodhte këtyre njerzëve. Dëshprimi më ndodhi edhe kur masa e popullit ndinte kënaqësi për këtë që i ndodhte këtyre njerzëve (këtë vetë e kam dëgjuar pasi që nuk më njihnin).
Sot vërtetë situata është më e mirë për këtë komunitet por nuk është e knaqëshme. Lëvizja e lirë e njerzëve të këtij komuniteti nuk mund të them se mungon plotësisht por është e kufizuar pasi që mundë të pësojnë për shkak të ngjyrës (edhe pse në disa rajone është thyer akulli). Unëe di se për këtë komunitet duhet të bëjnë më së shumti njerëzit (intelektualët) e këtij komuniteti por mendoi se duhet gjetur mbështetje te shqiptarët.

Ky komunitet sot e ka një parti politike - IRDK (Iniciativa e Re Demokratike e Kosovës) por unë mendio se është vështirë që ti mbrosh interesat e këtij komuniteti në mënyrë publike pasi që mendoi se mungon ende liria e të shprehurit. Është e vërtetë se ky komunitet pa asnjë probleme ka pranuar realitetin e ri të Kosovës por është evidente se nëse individ ose grupe të këtij komuniteti shprehen me sinqeritet për pavarsinë e Kosovës këtë shqiptarët e komentojnë me përbuzje ndërsa këta individë ose grupe gjenden para një nënshtrimi.

Unë po i përmbledhi mendimet e mia me këto konkluzione:

- Po të mos ishte prezent UNMIK-u dhe KFOR-i në kosovë do të kishim një numër shumë të vogël të njerëzve të këtij komuniteti (pjesa dërmuese do të dëbohej nga Kosova).

- Gjendja që sot është më e mirë e këtij komuniteti, është rezultet i guximit të vetë masës së këtij komuniteti, partive politike shqiptare (për shkak të presionit të ndëkombëtarëve), dhe organizimit politik të këtij komuniteti.

- Kosova do të intergrohet në Evropë duke u integruar menteliteti i popullit të saj. Unë e di se nuk kamë bërë analizë të mirëfilltë (pasi që nuk di) por më shumë kam shkruar "histori" , por unë vërtetë tani ndihem më lehtë pasi që kam shkruar atë që e ndijë, dhe i kam shkruar një njeriut që mua më konsideron - njeri, dhe për këtë jam i sigurtë pasi që ju njohë edhe përsonalisht.

Me nderime : Mendimi

P.S. Për arsye personale dua të mbetem anonim !

kthehu në faqen e parë